Jas akterdiń bastamasyna Oblystyq mádenıet basqarmasy ile qoldaý kórsetip, onyń uıymdastyrýyna, qarjylaı jaǵynan da kómek kórsetip otyr. «О́ner barysy» jarysyna, árıne, kásibı sportshylar emes, áýesqoılar qatysady. 3-4 mamyr kúnderi «Qazaqstan barysy» respýblıkalyq týrnıriniń «Qostanaı qyrany» dep atalatyn oblystyq irikteý satysy ótedi. «О́ner barysy» sol 4 mamyr kúni osy jarysqa jalǵasatyn bolady.
«О́ner barysyna» bir sózben aıtqanda ánshi, jyrshy, aqyn, asaba, rejısser sekildi ónerdiń aınalasynda júrgen seri jigitter óz erikterimen qatysady. Qazirdiń ózinde 30 jigit jazylyp otyr. Munda júlde bolmaıdy, óıtkeni bul jarys sportty nasıhattaýmen birge, qaıyrymdylyq paryzyn atqarady, – dedi Oblystyq mádenıet basqarmasynyń basshysy Erlan Qalmaq.
Erlan Bolatuly bastama kóterýshilerdi oblystyq «Kostanaıskıe novostı» gazeti janyndaǵy «Jızn na ladonı» qaıyrymdylyq jobasynyń jetekshisi Olga Abalakovamen kezdestirip, jastardyń bastamasynyń ıgi iske jalǵasýyna muryndyq boldy.
«Bastamalaryńyzǵa rahmet. Bizdiń jobada bir jarym jyl boıy kezekte turatyn balalar bar. Barlyǵyna da kómek kerek. Sizderdiń ótkizetin qaıyrymdylyq týrnırinen túsetin qarjy Torǵaı óńirindegi kóp balaly Jeksenbaılar otbasynyń qulaǵy nashar estıtin 8 jastaǵy Aqerke degen qyzyna estý apparatyn satyp alýǵa jumsalatyn bolady. Ol Reseıde keminde 500 myń teńge turady» dedi Olga Afanasevna.
Názıra Járimbet,
«Egemen Qazaqstan»
Qostanaı
